Ebizibu ebirala abatuuze bye baalombojjedde Kibuule mulimu amakubo amabi, amasannyalaze ng’ebyalo gye yatuusa amasannyalaze ebbanga we yabeerera omubaka na buli kati tegatambulanga kweyongerayo emyaka etaano nga balina essuubi nti oluvannyuma lw’okumuzza mu palamenti, amasannyalaze gagenda kuddamu okutambula.
Eyaliko omubaka wa Mukono North, Ronald Kibuule nga mu kiseera kino afunvubidde okulaba butya bw’amatiza abalonzi okumuzza mu palamenti asuubizza okutandikira we yakoma amangu ddala ng’awangudde akalulu.
Okutuuka okukola obweyamu buno, Kibuule yabadde atalaaga omuluka gw’e Bulika ogusangibwa mu ggombolola y’e Nama mu disitulikiti y’e Mukono gye yasanze ng’abantu bamulinamu ennyonta nga bamuloopera ng abwe babadde bamulekwa mu bigambo by’okukiikirirwa emyaka etaano gy’amaze nga tali mu palamenti oluvannyuma lw’okukola ensobi mu kulonda kwa 2021 ne balonda omuntu atalina ky’abakoledde nga ne mu kkonsituwensi babadde tebamulabako.
“Ssebo omubaka waffe tusaba otusinyiwe, twakola ensobi naye tuboneredde, omuntu gwe twalonda n’abamu bukyanga tumulonda tetumulabyeko, amazzi ge twali twafuna kati ate kyaddamu kyafuuka kizibu, nnayindondo ezimu zaafa ate ezikyakola zikimibwako abantu bangi, tulina essuubi nti ssinga tukuzzaayo, ekizibu ky’amazzi ojja kuddamu okinogere eddagala ng abwe wali okoze,” Ruth Nambi, omutuuze ku kyalo Lutengo A bwe yategeezezza.
Oluvannyuma lw’okutalaaga kkonsituensi eno eya Mukono North n’agimalayo ng’agenda akuba enkungaana Muluka ku Muluka, Kibuule yasazeewo okuddamu ate okugiyitamu mu nnaku ezisigaddeyo ezitakyawera na wiiki nnamba ng’agenda kyalo ku kyalo. Ku Lwokusatu, Kibuule yatalaaze omuluka gw’e Bulika ogukolebwa ebyalo 11 ng’eno yavuddeyo ng’abatuuze baliko bye bamubuulidde ebibaluma ne bamusuubiza nti tebagenda kudda mu nsobi gye baakola omulundi guli.
Ebizibu ebirala abatuuze bye baalombojjedde Kibuule mulimu amakubo amabi, amasannyalaze ng’ebyalo gye yatuusa amasannyalaze ebbanga we yabeerera omubaka na buli kati tegatambulanga kweyongerayo emyaka etaano nga balina essuubi nti oluvannyuma lw’okumuzza mu palamenti, amasannyalaze gagenda kuddamu okutambula.
John Ssettumba, omukulembeze ku kyalo Namulugwe yategeezezza nti; “ekyalo kyaffe kisembye nnyo mu kisanji kino wadde ng’ate mu biseera Kibuule we yabeerera omukulembeze twali bulungi mu nsonga ezisinga obungi. Twasobola okufuna amasannyalaze, amazzi naye byonna ebyo ate bye bizibu ebitukaabya teekako amakubo amabi, abatuuze batukakasizza nti eddagala lya bino byonna liri mu kuddamu kulonda Kibuule.”
Ku kyalo Walusubi, ab’eno baalaze okuyaayaana nga bagamba nti bakooye ebigambo kye kiseera bazzeeyo omukulembeze ow’ebikolwa.
“Tukikkiriza nti omusango gwali gwaffe balonzi, munnaffe gwe twalonda akoze gwa kwekkusa yekka, olwo ffe abaamutuusa mu madaala g’alimu n’atwelabira. Ab’olubatu omukulu b’akutteko ba nzikiriza ye ey’Obusiraamu, sso ng’akyo tekyaliwo ku mulembe gwa Kibuule, nga teyeetaaga kumanya ggwanga lyo, ddiini yo, n’ensonga endala, naye nga be kiri nti omala kw’ekoona n’oly’oka obuuka, naffe tuyigidde mu nsobi gye twakola, tetugenda kudda mu nsobi y’emu,” Prossy Draru, omutuuze w’e Walusubi bwe yategeezezza.
Ng’ayanukula, Kibuule yagambye nti mumalirivu okukola ku bizibu by’abantu ng abwe yakikolanga n’okukirawo ku mulundi guno kuba eky’okukola akimanyi takyetaaga budde kuyiga ng abwe guli ku bamu ku beegwanyisa entebe eno okuli n’oyo agirimu.
“Nze mmanyi ew’okusaka, mmanyi ew’okujja buli kiyamba abantu bange kuba nnakikola ne mu mwaka gwe nnasooka okubeera mu palamenti,” Kibuule bwe yategeezezza.
Yagambye nti okuleka okutambuza amazzi mu kkonsituwensi ye, ne mu bitundu ebirala ebya disitulikiti y’e Mukono yabiyamba ne bifuna amazzi era nga mu disitulikiti, amazzi kizzeemu okufuuka ekizibu eky’amaanyi mu myaka etaano gy’atabadde mu bukulembeze.
“Amasannyalaze twagabuyisa ebyalo, eky’akabi, ate ttulansifooma bwe zibadde zifa ng’ate abantu be baalonda tebalina kye bayinza kuyamba ng’era baddukira wange, obw’olumu ate nga nze nkola ekisoboka okuzza embeera mu nteeko,” Kibuule bwe yategeezezza.
Ono yagasseeko, “oluvannyuma lw’okutegeeza Pulezidenti ensonga y’omusaala ogusookerwako eri abakozi abakola mu makolero, ge nnasobola okusaka mu bungi okujja mu magombolola gange okuli Nama ne Kyampisi, ate ku mulundi guno tuluubiridde okulaba ng’amakolero gongera okuzimbibwa olwo ensonga y’ebbula ly’emirimu eyongere okufuuka olufumo. Tulina enteekateeka okulaba ng’ezibadde essamba z’ebikajjo zifuulibwa amakolero olwo Mehta Pulezidenti alabe gy’amuwa ettaka ewalala asimbeyo ebikajjo.”
