Nambooze yasekeredde Bakaluba n’agamba nti wadde yamuyamba okufuuka ssentebe wa disitulikiti, ate olwatuuka mu bukulembeze n’atandika kulwana ntalo n’alemwa okukola ebintu bye beeyama ku budaala bwe baalingako bonna nga basaba obululu.
Olutalo lw’okunoonya akalulu ku kifo ky’omubaka wa munisipaali y’e Mukono lutuuse lwe lunyumira oba tugambe nti ennamusa etuuse ku nnyoonge, embeera eno ezzeewo oluvannyuma lw’omubaka Betty Nambooze Bakireke, alwana okufuna ekisanja eky’okutaano olwo aweze emyaka 25 nga ye mubaka w’ekibuga Mukono okudda ku bamuvuganya okuli Rev. Dr. Peter Bakaluba Mukasa ne Hanifah Nabukeera Luswata ababadde mu kibiina kya NUP n’abakolokota n’abaleka nga bafotookeredde!
Nambooze ng’asinziira mu lukungaana lw’okusaba obululu lwe yakubye e Nassuuti, yategeezezza nti Bakaluba ne Nabukeera baasazeewo kuzannya kifiiriza oluvannyuma lw’okusaba kkaadi ku bifo eby’enjawulo mu kibiina kya NUP kyokka ne bazibamma olw’okulaba ng’obukulembeze bwabwe bwe babadde nabwo bubaddemu ebirumira bingi nga n’olw’ekyo, bano tebasaanidde kweyongerayo.
Nambooze yeewuunyizza era n’atendereza Abaganda abaagereesa nti; “Bakuseerera mu katale, oyombesa kkubo,” ng’eno etuukira bulungi ku Bakaluba ne Nabukeera, bakitawe abaasaba kkaadi okuli ey’okuvuganya ku kifo kya ssentebe wa disitulikiti (Bakaluba) ssaako Nabukeera eyasaba kkaadi avuganye ku kifo ky’omubaka omukyala owa disitulikiti y’e Mukono ky’abaddemu, nga bano olwa zibamma, obusungi ne babuggya ku bakulu ab’akakiiko akasunsula ak’ekibiina, ate ne bakkira okwekwasa ye, era ne bamaliriza ng’ebifo bye baabammirako kkaadi babisuddewo olwo ate nga babuukidde ekikye mu ngeri buli omu gye yeewuunya!
Ono agamba nti yamaze okugwa mu lukwe lw’abakulu bano, ng’olw’okuba ebyabwe by’abalema, kati baagala naye (Nambooze) mbu aweerezza obulungi Bannamukono ne basalawo n’okumusiima nga bamulonda buli mulundi gw’abadde yeesimbawo ate ne baagala mbu bamulemese, nga beekobaanye n’aba NRM okulaba nga bafuna oluwenda we banaamubbira akalulu.
Kyokka bano Nambooze yabakongodde n’agamba nti Bannamukono babasanze balaba, ng’ezo enkwe za ssitaani teziggya kutuukirira.
“Buli muntu yeewuunya, abo baali baalemwa, ne baggya banneekwatako ne bafuna ku masannyalaze ne batuuka mu bukulembeze, era okutegeerekeka mpulira baboogerako nti ono ye yeesimye ku Nambooze, kati omusango gwe bannanga, mbu nze njogera nnyo, ekinneewuunyisa, ate abalonzi mu bitundu ebirala abalina ababaka bassekibotte abeefaanaanyiriza ku bannaffe bano, ate mpulira bbo bagamba nti ku mulundi guno baagala kulonda ku babaka aboogera, bakooye abatavaamu kigambo! Kati ate mmwe bagezaako okubatimba bbula, mbu mwejjeko akabiriiti kammwe, mbu mukasikize abatavaamu kigambo! Ekyo kikafuuwe,” Nambooze bwe yategeezezza.
Ekifo ky’omubaka wa munisipaali y’e Mukono kiriko abavuganya 11 okuli Nambooze (NUP), Bakaluba (Talina kibiina), Nabukeera (Talina kibiina), Dr. Daisy Sarah Nabatanzi Ssonko (NRM), George Fred Kagimu (DP), Allan Mawanda (DF), Sarah Nakintu (PFF), Ssenkeko Kulubya, Andrew Ssenyonga (Talina kibiina), Dunstan Mbogo (FDC), Herbert Oromolo Omo (Talina kibiina).
Abasinga ku bavuganya Nambooze, bazze bakirambika lunye nti Mukono kye kiseera yeggyeko omubaka akola ogw’okwogera obwogezi ng’ekikolwa talina, olwo bbo aba waaka engabo bagikwatemu.
Bano kuliko; Rev. Bakaluba Mukasa, Nabukeera, Allan Mawanda, Dr. Daisy Ssonko ne Andrew Ssenyonga.
Nambooze yasekeredde Bakaluba n’agamba nti wadde yamuyamba okufuuka ssentebe wa disitulikiti, ate olwatuuka mu bukulembeze n’atandika kulwana ntalo n’alemwa okukola ebintu bye beeyama ku budaala bwe baalingako bonna nga basaba obululu omwali n’okulaba nga bayamba abaana Bannamukono okufuna emirimu.
Wano yanokoddeyo eky’okuba nti Bakaluba yalemererwa n’okulonda abakiise ku lukiiko olugaba emirimu olwa disitulikiti (DSC) nga n’okutuusa olwa leero, luno terukola ng’ensonga zeekuusa ku mukulu oyo.
Ng’anoonya obululu, Bakaluba ebimu ku by’avunaana Nambooze kwe kuba nti taliiko wadde akadaala k’ennyanya k’azimbye mu myaka 20 gy’abadde mu palamenti okuyamba Bannamukono okufuna emirimu sso ng’ate ye ng’ayita mu masomero g’azimbye kumpi mu buli kkonsitunwensi nga mu munisipaali mwokka mulimu amasomero abiri aga Paul Mukasa erya ssekendule ne ppulayimale nga gano gawadde abantu abali eyo mu bikumi emirimu n’okuyamba okusomesa abaana b’eggwanga.
Namilyango School Children Decry Misgovernance, Land Grabbing, Illegal Detentions
Ng’amwanukula, Nambooze yagambye nti ng’omubaka wa palamenti, akoze ebyalema ne Bakaluba k’abeere Nabukeera okukola mu kiseera nabo we babeeredde mu palamenti omuli okuteeseza ekitundu n’eggwanga lyonna, okulwanirira abantu b’akiikirira omuli n’abasuubuzi ekitongole kya URA ekisolooza omusolo be kyali kibinise omusolo oguli eyo mu bukadde bw’ensimbi ku buli musuubuzi ng’oluvannyuma lw’okubiyingiramu, abakulu beekufulula ne gye buli eno tebaddanga, okulwanirira abasuubuzi okusigala nga bakolera ku makubo n’ensonga endala nnyingi.
“Munnaffe oyo bw’aba yeewaana okuzimba amasomero, aggye akwateko limu aliteeke mu gavumenti, olwo tumanye nti abaana basomera bwereere, awo nno tulimutenda omutima omugabi sso si kudda mu kututimba bbula ng’ali mu kukungaanya musimbi,” bwe yategeezezza.
Wabula ebya Nambooze ng’obitadde ebbali, Bakaluba awera nkolokooto, nti Nambooze bukyanga alya myungu, leero alidde butanga, nti tagenda kumulabya ku njuba. Mu kiseera kino, enkambi ya Nambooze Bakaluba ne Nabukeera buli lukya bagikubamu ebituli omuli okumuggyako abantu bwe baludde mu ‘struggle’ nga n’akyasembyeyo, y’abadde kanyama wa Nambooze amuwa obukuumi okumala ebbanga eddene, Yeko Sasira abasinga gwe bamanyi nga Ssaasi
St. Francis Namilyango Hillside Artists Prescribe Good Governance Dose