Ku mulundi guno, ono alangiridde Francis Lukooya Mukoome nti y’awangudde Lukooya n’obululu 52,523 nga Muyanja azze mu kyakubiri n’obululu 52,105 ye Lauben Ssenyonjo abadde ku bwa nnamunigina afunyeeyo obululu 2095.
Wabaddewo katemba ku kitebe ky’eby’okulonda e Mukono ekifo kimu ekya ssentebe wa disitulikiti bwe kirangiriddwako abantu babiri ng’owa NUP, Johnson Muyanja Ssenyonga y’asoose okulangirirwa ng’awangudde n’obululu 51,686 so nga ye Lukooya Francis Mukoome amulaze ng’afunye obululu 50,254.
Oluvannyuma lwa Ssenyonga okulangirirwa, ye n’abawagizibe baatandise okujaganya ng’eno ne Lukooya n’ababe bwe bajaganya nga buli ludda lugamba nti luwangudde.
Ekiddiridde ye ssentebe wa NRM e Mukono, Haji Haruna Ssemakula ne Capt. Reagan Muganza okuyingira ne beesogga akafubo n’akuliddemu okulonda mu disitulikiti, Emilly Amongin era wano okulangirira we kukomye okumala essaawa nga ssatu nnamba!
Mu kusooka, wadde nga bulijjo okulangirira abawanguzi kukolebwa ng’ab’amawulire bakkirizibwa okukwata akulira eby’okulonda, ono yalangiridde ali munda ng’omulyango oguyingira guggaliddwa nga kuliko n’abasirikale ababadde batakkiriza muntu kuyingira wadde ow’amawulire era twamukutte ddoboozi ng’alangirira Muyanja.
Bano nga bali mu kafubo, ng’ate bbo aba NUP teri n’omu akkirizibwa kuyingirayo, nga yabadde yeemulugunya ne ku ky’okuba nti wadde yabadde alangiriddwa, yabadde taweereddwa mpapula zimukakasa ku buwanguzi.
Oluvannyuma Haji Ssemakula avuddeyo nga wano Lukooya ayise ab’amawulire naye n’ayogera nabo ng’agamba nti yabadde awangudde ekifo kino.
Embeera eyongedde okubeera ey’obunkenke ng’abasirikale aba poliisi bali awo bakoze olugo olutangira abeesimbyewo okuyingira mu kisenge okubadde mugattirwa obululu n’okulangirira abawanguzi.
Ng’obudde buwungedde ssaawa nga 12:30, Amongin avuddeyo munda n’adda ku lubalaza lwa woofiisi y’akakiiko n’alangirira ng’atandikidde ku kifo kya sentebe wa disitulikiti kye yabadde yamaze edda.
Ku mulundi guno, ono alangiridde Francis Lukooya Mukoome nti y’awangudde Lukooya n’obululu 52,523 nga Muyanja azze mu kyakubiri n’obululu 52,105 ye Lauben Ssenyonjo abadde ku bwa nnamunigina afunyeeyo obululu 2095.
Ne ku bifo by’abavuganya ku bwakkansala, nabo balaze obutali bumativu nga bagamba nti aba NUP ebifo bye baawangudde ate aba NUP be balangiriddwa.
Amongin alangiridde ebivudde mu kulonda mu ggombolola ly’e Nama, nga wano, munna NUP, Paul Kawombe abadde avuganya ne Mulamira Gashegu owa NRM ng’abadde yajaganyizza dda ng’alindiridde kulangirirwa aguddewo ekigwo bwe balangiridde munne Gashegu.
Ono alaze obutali bumativu ng’alekaanira waggulu ekiviiriddeko n’abasirikale ba poliisi okumufulumya mu kifo kino ng’akolima bukolimi.
Ye Gashegu asambazze ebyogeddwa Kawombe ng’agamba nti abantu baamuwadde obululu obumutuusizza ku buwanguzi.
