BYA ABU BATUUSA | BUSUKUMA | KYAGGWE TV | Poliisi y’e Kasangati ezinzeeko ekifo kya Afro-Taste Garden ekisangibwa e Busukuma mu disitulikiti y’e Wakiso aba NUP mu Nansana munisaali we babadde bategese olukungana n’ebalemesa okuyingira.
Poliisi esimbye kabangali yaayo ku ggeeti mu mulyango oguyingira mu kifo kino nga tekomye wano, egaanye n’okutiisatiisa bannanyini kifo kino obutageza kuggulira banna NUP bano wadde okuteekako emizindaalo.
Olukungaana luno lubadde lwayitiddwa Omubaka wa Nansana munisipaali, Wakayima Musoke Nsereko awamu ne ssentebe wa Kunga mu Nansana, Stephen Mukalazi nga bali wamu n’abakulembeze ba Nansana ab’ekibiina kya NUP okutwalira awamu.
Aba NUP babadde batandise okukungaana naye bagenze okulaba nga ekifo awaategekeddwa olukungaana nga poliisi ekizinzeeko era nga tebakirizza muntu yenna ayingira. Bano batandise okwekungaanya ku bbali ekizeeko kw ekutambula ne balumba ekifo kya Afro-Taste balabe oba banaayingira.
Omubaka Wakayima alabiddwako ng’ayogerako n’atwala poliisi y’e Kiwenda era naye n’abagamba nga bwali ku kiragiro kya DPC w’e Kasangati Moses Musinguzi. Ono abalagidde okwogera ne DPC ng’ono ssinga abakkiriza, olwo ng’abaleka nga beegazaanya kuba ye tabalinaako kabi konna.
Ye ssentebe wa NUP e Busukuma, Kisekka Mbaaga atutegeezezza nga bwe baategese olukungaana okusomesa abantu ku nsonga y’akakiiko k’eby’okulonda egenda mu maaso ey’okuzza obuggya enkalala z’abalonzi n’okubakunga okujjumbira ensonga eno.
Kisekka agambye nti yawandiikira be kikwatako ng’abategeeza ku lukungaana lwabwe luno kyokka nti ate ekibaggye enviiri ku mutwe, ye poliisi okubeekiikamu.
Omubaka Wakayima agezezzaako okwogera n’aba poliisi bano ng’olukungaana luno bwe lubadde olw’emirembe naye ng’amala bya mu bulago.
Ono tekimumalidde, asazeewo okwogerako n’abantu ababadde bakungaanye wabweru awo n’alaga engeri poliisi ate gy’eyagala okubasindika okumenya amateeka wadde nga bbo si bye byabadde ebigendererwa by’olukungaana lwabwe.
Agambye nti ng’omubaka wa palamenti, teri tteeka ly’aba amenye okusisinkana abantu be okubaako by’abasomesa naddala ku nsonga eno enkulu ey’okwewandiisa n’okukebera enkalala z’abalonzi.
