Omuvubuka akozesa omutimbagano gwa Tiktok, Henry Nyanzi akwatiddwa n’aggalirwa ng’ogumulangibwa gwa kuvuma n’okuvvoola eyali Minisita omubeezi ow’amazzi era eyali omubaka wa palamenti owa Mukono North, Ronald Kibuule.
Nyanzi nga ku Tiktok akozesa akawunti eri mu mannya ga Henric Brown ye yakwatiddwa n’aggalirwa ku poliisi e Mukono.
Emboozi ya Ssaalongo John, Eyali Omusomi W’ebirango ku Leediyo Uganda ne CBS
Ono mu ka video ke yatadde ku Tiktok account ye yabadde alumba Minisita Kibuule ku nsonga ezitategeerekeka bulungi ng’ajuliza ne ku baana abalongo aba Minisita abaafa oluvannyuma lw’okugwa mu kidiba ekiwugirwamu ekiri mu maka ga Minisita agasangibwa e Mbalala mu ggombolola y’e Nama mu disitulikiti y’e Mukono. Ono era yagasseeko n’okugwa mu by’obufuzi bwe yafiirwa ekifo ky’obubaka bwa palamenti mu kalulu akaggwa mu 2021.
Nyanzi yeewaana ng’ebizibu bino ebyatuuka ku Kibuule bwe byava ku ntalo mu kifo ky’atannyonnyola bulungi. Ono eyeetenda obulogo agamba nti ate ku mulundi guno agenda kukwatagana n’ekibinja kye baloge abantu abakulembeze abalala bangi nabo bagwe mu bizibu bye bimu.
Mu kiseera kino, abavubuka abakozesa omutimbagano mu kuvuma abantu bazze bakwatibwa nga bavunaanibwa okuli eyeeyita Pressure 24/7 eyavuma Kabaka, Pulezidenti Museveni n’abakulembeze abalala.