Omubaka wa gavumenti atuula mu disitulikiti y’e Buvuma Jacqueline Birungi Kobusingye asimattuse akabenje. Okusinziira ku beerabideko n’agaabwe, RDC Birungi abadde ava ku woofiisi ye esangibwa e Kitamiiro ng’ayolekedde e Kirongo ku mwalo okulinnya ekidyeri okuva e Buvuma.
Amyuka RDC w’e Buvuma Patrick Mubiru akakasizza nga ddala mukamaawe bw’asimattuse akabenje kano nga kagudde ku kyalo Busamuzi mu maaso g’eddwaliro lya Busamuzi Health Centre III.
RDC abadde mu mmotoka ye ey’omulimu ekika kya Isuzu Double Cabin nnamba UG 4287C ng’eno yeefudde wabula ababaddemu okuli RDC, omukuumi ne ddereeva waayo ne basobola okusimattuka.
Kigambibwa nti omukuumi wa RDC ye yekka afunye ebisago naye nga nabyo si bya maanyi nnyo.