Rev. Mugalu yategezezza abakungubazi okweteekerateekera okufa kubanga abantu kati bafa mu nfa etategeerekeka n’ageza ku Ssebunnya gwe yagambye nti yafudde mu ngeri ey’ekibwatukira ate ey’ekyewuunyo ennyo.
BYA ABU BATUUSA
Okuziika bbulooka w’ettaka, David Ssebunnya abadde amannyiddwa ennyo nga Kapipa eyafiiridde mu kabenje kweyolekeddemu katemba, ab’abaana b’omugenzi bwe basse mu ntaana ne baggyayo omulambo gwe ogwabadde gumaze okuziikibwa nga balumiriza nti gwabadde guziikiddwa n’eddagala.
Embeera eno yazzeewo oluvannyuma lw’ebigambibwa okubeera omuzimu gw’omugenzi okukwata abamu ku baana b’awaka ne gubavulunga okukkakkana nga balumbye entaaka gye baabadde bamaze n’okuyiwako enkokoto ne basikayo akatimba enkokoto n’eyiikayo.
Kino kyawalirizza okuggyayo kkeesi omwabadde muziikiddwa omugenzi n’esooka eteekebwa ku bbali. Embeera eno yawalirizza abakungubazi okuyita abasirikale ba poliisi y’e Gombe eyatuuse ng’abaana abagambibwa okulinnyibwako omuzimu gw’omugenzi beesaze akajegere ne bakola butaweera okutuusa lwe bazzizza embeera mu nteeko.
Ssebunnya yafunye akabenje akaamuttiddewo bwe yabadde agenda okulambula ekibanja kye ekisangibwa ku kyalo Jjagala ekiri mu ggombolola y’e Gombe mu munisipaali y’e Nansana ng’aba ffamire baawanuuzizza nti akabenje kano kaabadde kapange.
Omugenzi abadde yeegulira erinnya okulwanirira abantu abagobebwa ku ttaka naddala ab’ebibanja nga kiteeberezebwa ng’eno yandiba emu ku nsonga lwaki abatamanya ngamba baasazeewo okumupangira akabenje akaamuggye mu budde.
Ono okusinga abadde yeesimba mu mugagga Isaac Mulindwa abasinga gwe bamanyi nga Macknawa ng’aliko abatuuze b’aguguulana nabo ng’ayagala okubagobaganya okuva ku bibanja byabwe e Jjagala.
Ssebunnya era yakulemberamu abatuuze bano okudda mu bibanja byabwe nga October 8, nga kino kyawaliriza n’abasirikale b’obwannanyini abakuuma ettaka ly’omugagga okukuba amasasi mu bbanga okugumbulula abatuuze abaali bakaaye okukirako ennumba enkubemu ejjinja. Embeera eno yawaliriza n’abakungu okuva mu State House okuyingira mu nsonga zino.
Ku Lwokusatu, Ssebunnya Kapipa yatomedwa mmotoka e Jjagala bwe yabadde agenda okulambula ekibanja kye era teyasimattuse. Akabenje kano okubeerawo, nga ku Mmande ya wiiki eno, nga November 17, Ssebunnya yakwata eddoboozi ng’alaga okutya ng abwe yali afunye abantu abamulabula nti ssinga tava mu nsonga z’ettaka ly’e Jjagala, baali bagenda kumutta mu bbanga eritali ly’e wala, ng’ekyaddiridde kwe kutomerwa mmotoka nga waakayita nnaku bunaku ezitaweza na wiiki!
Omusasi waffe olwategedde ku nsonga zino, yakedde ku kyalo Gombe mu maka g’omugenzi era yasanze nga abakungubazi batwala Ssebunnya mu kibanja kye ekigambibwa nti kirabika kye kyamuviiriddeko okulugulamu obulamu era nga baasoose nakuyisa bivulu okuva mu maka ge nga bakulembedwamu abagoba ba bodaboda awamu ne mikwano gye gy’abadde addukanya nabo emirimu gy’obwa bbulooka bw’ettaka.
Bano olwatuuse ku ttaka eryogerwako abakungubazi baasitudde omulambo gwa munnaabwe ne bagukunguzza kumpi mmayiro ttaano okutuuka ku nyumba ye eyakonebwa n’esuulibwa wansi era bano obwedda batambula bwe boogera ebigambo nga munnaabwe bwe yattiddwa era olwatuuse omulambo ne baguwummuza mu nyumba ye n’ekyazzeeko ne bafukamira wansi ne bamusabira era olwamalirizza ne bagusitula era ne bagukunguzza mpaka ku mmotooka ya funeral service ne guddizibwa mu maka ge.
Oluvanyuma okusabira omugenzi kwatandise nga kukulembedwamu Rev. Nathan Mugalu.
Rev. Mugalu yategezezza abakungubazi okweteekerateekera okufa kubanga abantu kati bafa mu nfa etategeerekeka n’ageza ku Ssebunnya gwe yagambye nti yafudde mu ngeri ey’ekibwatukira ate ey’ekyewuunyo ennyo.
Abantu ab’enjawulo okwabadde mikwano gy’omugenzi Ssebunya baamwogeddeko nga bw’abadde omusajja omulungi naye newankubadde afudde kino tekiyinza kubamalamu maanyi nti baakugenda mu maaso n’okulwanirira ebibanja byabwe okutuuka ku ssaawa esembayo.
Oluvanyuma omubiri gw’omugenzi gwatwalidwa okuguziikibwa awo abaana b’awaka ekigambibwa okubeera omuzimu we gwabakwatidde ne batandika okugwa ku ntaana eyabadde ewedde okujjiyuwa enkokoto ne basikambulamu akatimba nga bwe bagamba nga bwe waliwo eddagala eryabadde liziikiddwa mu ntaana eno.
Bano obwedda beevulungulira ku ntaana waggulu okuli enkokoto n’ekivuddemu y’entaana okugwamu okukkakkana nga keesi bagiggyeyo omulambo ne baguggyamu olwo keesi ne bagisindiikiriza mu bitooke.
Oluvanyuma lwa poliisi okuva e Gombe okutuuka, yasobodde okukola ekisoboka okutuuka embeera lwe yazze mu nteeko.
Bbo abantu beekebezze omulambo gw’omugenzi okukkakkana mbu nga baguggyemu akantu akaabadde kazingiddwa mu kaveera nga kali mu masuuka bbo ke baayise eddagala abaana lye baabadde boogerako abagambibwa nti babadde balinyiddwako omuzimu gw’omugenzi.
Ekyaddiridde kwe kubalukawo kw’olutalo abamu ku bakungubazi bwe baalabye omusajja Joel Ssebanyiga bbo gwe bagamba nti alabika yeyaviriddeko omuntu waabwe okuffa mu nfa etaategerekese era mbu nga y’omu omugenzi gwe yayogerako muka video nga agamba nga bwe yali ayagala okumuggya mu bulamu bw’ensi.
Wetuviriddewo ku ssaawa nga bbiri ez’ekiro ng’omulambo gwa Ssebunnya gukyalemedde kungulu naye nga gukuumibwa poliisi n’amagye okulinda okulaba oba baddamu okuguziika.
Chinese Investors Join Kibuule on Campaign Trail, Pushing for Labour Reforms