Katikkiro wa Buganda, Charles Peter Mayiga yatongozza bboodi y’eby’obulambuzi n’ennono ey’Obwakabaka bwa Buganda. Bboodi eno ekulemberwa Omuk. Benon Ntambi ng’ono amyukibwa Ssuuna Luutu.
Bammemba abalala kuliko; Omuk Farouk Busuulwa, Claire Mugabi, Kaweesi Daniel, Kitenda John, Edirisa Luwangula, Jimmy Kigozi, Claire MugabiNamuyimbwa Allen, Ssebuggwawo Marvin ne Justine Naluzze Ssembajjwe.
Katikkiro yategeezezza; “Ensi nnyingi ezifuna ensimbi nga ziyita mu by’obulambuzi, era naffe tulina okubisoosowaza.
Mu Buganda ne Uganda tulina enkizo ku nsi endala nti eby’obulambuzi byaffe ebisinga bya butonde, ebirala biteeketeeke sso ssi biyiiye. N’olw’ekyo twetaaga kubisabika bulungi olwo twongere okusikiriza abalambuzi.
Ntongozza bboodi y’Obulambuzi n’Ennono ey’Obwakabaka, twagala okulaba ekitongole ky’obulambuzi nga tekiriiwo bubeezi mu linnya, wabula nga kukola emirimu gye tusuubira egigasa Obwakabaka wamu n’abakozi b’ekitongole.”