Abatuuze ku kyalo Kalagala mu ggombolola y’e Ngogwe mu disitulikiti y’e Buikwe baguddemu encukwe, emmotoka ebadde ewenyuka obuweewo bw’eremeredde omugoba waayo ne yeerindiggula ennume y’ekigwo okukkakkana ng’abantu bataano bafu.
Akabenje kano kagudde ku luguudo oluva e Nkokonjeru okudda e Nyenga. Abeerabiddeko n’agaabwe bategeezezza Kyaggwe TV nti abantu bana Ku munaana ababadde mu mmotoka eno bafiiriddewo mbulaga ate omu n’afa nga ky’aggye atuusibwe mu ddwaliro lya St. Francis Hospital e Nkokonjeru.
Emmotoka ekoze akabenje kika kya Double Cabin nnamba UBF 323N ng’ebadde eva Soroti ng’edda Kampala.
Abalala abasimattuse akabenje kano batwaliddwa mu ddwaliro e Nkokonjeru nga taasulewo tasiibewo y’ali ku mimwa.
Okuva oluguudo luno lwe lwakolebwa ne luyiibwa kkoolansi okuva e Wantoni mu kibuga Mukono okuyita e Kisoga okugenda e Nyenga ne luyitamu ppaka Njeru okwolekera Jinja n’okweyongerayo, abavuzi b’ebidduka bangi balwettanira olw’obutabaako jjaamu nga n’embeera yaalwo nnungi.
Omugoba w’emmotoka eno etegeerekese nga William Osinde.