Okutumbula eby’obulimi n’obulunzi mu bulabirizi bw’e Mukono y’emu ku mpagi enkulu omulabirizi w’e Mukono, Enos Kitto Kagodo ze yateeka ku mwanjo nga yaakatuula mu woofiisi mu kaweefube we gw’aliko ow’okubbulula ekkanisa n’Abakulisitaayo okuva mu nnawookeera w’obwavu.
Omulabirizi Kagodo yagamba nti essira ayagala liteekebwe ku kulima emmwanyi, ebitooke, n’ebirime ebirala ssaako okulunda n’okusimba emiti.
Wansi w’enteekateeka eyo, Omulabirizi Kagodo kati buli lw’alambula omusumba obw’enjawulo ng’agenze okuteekako Abakulisitaayo emikono, asooka kulambula ppulojekiti ezo okulaba oba Abasumba mu busumba obwo baawuliriza okulagira kwe oba nedda.
Ng’atuuse mu Busumba bw’e Nazito mu busaabadinkoni bw’e Kangulumira mu disitulikiti y’e Kayunga enkya ya leero, Ssaabadinkoni waayo, Canon Ignatius Kabuuka ng’ali n’omusumba w’obusumba buno ku kitebe kyabwo ku kkanisa y’Omutukuvu Balunabba, bamulambuzza olusuku oluli mu musiri gw’ennanaasi n’asiima olw’okuteekesa mu nkola ebiragiro bye.
“Tuli mu kiseera kizibu n’omulembe muzibu akakyo kano. Osanga abantu nga bali mu kyalo, balina ettaka erisoba ne mu yiika naye nga bakaaba enjala. Njagala Abakulisitaayo abo bwe bajja ku kkanisa wano okusaba, nga basanga pulojekiti y’ekkanisa oba ya kulima bitooke na nnanaasi, nga bagyegomba ate nga nabo baddayo nga bakola kye kimu. Okuleka nga tusitukiddemu okulwanyisa ekirwadde ky’obwa ssemugayaavu, abantu baffe baakusigala nga bakaaba obwavu. Ate Abakulisitaayo bwe babeera abaavu, n’ekkanisa ebeera njavu era n’omulimu gw’enjiri ne guzingama,” Omulabirizi bw’ategeezezza.
Omusumba Joshua Welishe atwala obusumba buno ayanjulidde Abakulisitaayo 40 abateekeddwako emikono mu kusaba kuno.
Omulabirizi ayise ne Maama Catherine Kitto sso nga ne Ssaabadinkoni Kabuuka naye Maama Proscovia tamulese mabega.