Omulabirizi akuuma entebe y’obulabirizi bw’e Luweero, Bp. James William Ssebaggala alabudde Abakulisitaayo n’abaweereza mu kkanisa abakyekulubeesa ne Canon Godfrey Kasana Ssemakula eyali alondeddwa okufuuka omulabirizi w’e Luweero n’amala n’asuulibwa.
Omulabirizi okuvaayo kiddiridde Canon Kasana okugenda mu maaso n’okukola emirimu ng’omusumba mu bulabirizi bw’e Luweero ng’era ono asongebwamu ennwe ng’akuma mu Bakulisitaayo omuliro n’okubatemaatemamu.
Gye buvuddeko, Canon Kasana yalabibwa ng’akulembedde okusaba mwe yasinziira n’abatiza n’abaana. Mu kusaaba kwe kumu kuno, AAbakulisitaayo era baatandika n’okusonda ensimbi ez’okumugulira emmotoka nga bagamba nti ye gwe bamanyi ng’omulabirizi waabwe era ne basaba atuuzibwe ekyo nakyo kive mu ddiiro.
Kino kye kimu ku by’atanudde Bp. Ssebaggala n’ava mu mbeera n’atuuka okukubisa ttiketi z’obubatize eziriko ssiiru ng’agamba nti buli mwana abatizibwa alina kuweebwa ttikiti zino ng’oyo anaabatizibwa n’ataweebwa ttikiti eriko ssiiru aggya kuba amaze bya mu bulago.
Global Junior School Ushers Kids into New Year in Style While Unveiling New Campus
Ttikiti eziriko ssiiru, omu ku Musumba ayogeddeko ne Kyaggwe TV ategeezezza nti bazisanga ku kitebe kya bulabirizi ng’era buli emu bagigulayo ku nnusu enkumi ssatu (3,000) ng’ono y’omu ku kaweefube omulabirizi mw’ayise okufuna ensimbi ezigenda okuyambako mu kuddukanya emirimu gy’obulabirizi.
Mu kiseera kino mu bulabirizi bw’e Luweero, Abakulisitaayo beeyawuddemu ebiwayi bibiri ng’ekisinga obunene kiwagira Bp. Ssebaggala naye ng’eriyo ekiwayi ekyagenda ne Canon Kasana era bano bawanda muliro.
Wabula ku nsonga ya Canon, abamu ku Bakulisitaayo e Luweero bagamba nti bwe kiba nga takkirizibwa kugenda mu maaso na kuweereza ng’omusumba, kye kiseera Obulabirizi oba Ssaabalabirizi bamuyimirize mu butongole kuba mu kiseera kino ekyo tekikolebwanga nga n’olw’ekyo kitegeezaa nti ne by’akola biba bikkirizibwa.