“Okuddiza guba mwoyo, n’owuwo akumma.” Mu mbeera eyo, Obwakabaka bwa Buganda buddizza ku bantu ba Nniyimu, abayizi mu ssomero lya Bbowa Vocational Secondary School bwe buwaddeyo entebe abayizi kwe batuula 100 okubasobozesa okusomera mu mbeera ennungi nga yeeyagaza.
Enteekateeka eno eri mu kaweefube w’okusitula omutindo gw’eby’enjigiriza mu nsi ya bwoobwe Buganda.
Bwe yabadde awaayo entebe zino eri abakulira e ssomero lino, Minisita avunaanyizibwa ku by’enjigiriza n’enkulaakulana y’Abantu mu Bwakabaka, Oweek Chotilda Nakate Kikomeko, yasabye abayizi okulemera ku nsonga y’okusoma wamu n’okukozesa ebiseera obulungi kubanga y’ensonga enkulu lwaki bali ku ssomero.
Oweek: Nakate abayizi abasabye okubeera eky’okulabirako eri abalala era baperereze bannaabwe abali eyo babeegatteko ku Bbowa Vocational Secondary School mu lusoma oluddako.
Omukulu w’essomero lino, James Lubowa yeebaziza nnyo Obwakabaka okufaayo ennyo eri essomero lino n’ategeeza nti essomero okuva lwe lyafuna ekizimbe ekipya ebintu ebikyuuse nga n’omuwendo gw’abayizi gweyongedde okutuuka ku 350.